මම දැන් නිදහස් මනුෂ්‍යයෙක්

Jul 10th, 2017 | By | Category: LGBTIQ ප්‍රජාව, OTHER NEWS

ඉන්දියාවේ බැංගලෝර්හි වාසය කරන නාදිකා නඞ්ජා විසින් රචනා කරන ලදුව Arrow for Change  සඟරාවේ Gender, Romance and the Internet ලිපියේ සිංහල පරිවර්තනය සමබිම 2016 දෙසැම්බර් කලාපයේ සිට පළ වූ අතර මෙවර ඔබ වෙත ගෙන එන්නේ එහි පස්වන කොටස හෙවත් අවසාන කොටසයි. නාදිකා නඞ්ජා ඉන්දියාව තුළ වෙනස් ලිංගික අනන්‍යතාවයක් සහිත ප්‍රජාවන්ගේ අයිතිවාසිකම් (LGBTIQ Rights) වෙනුවෙන් ලේඛන කාර්යයේ යෙදෙන අතර ‘ගැහැනුන්’ සහ ‘පිරිමින්’ වශයෙන් වෙන ද්විත්ව ලිංගිකාකාරයෙන් බැහැර අයෙකු(Non – binary Person) ලෙස නාදිකා තමාව හඳුන්වා දී තිබේ.

thh
මෙතෙක් මා අත්විඳි කටුක ජීවිතය වගේම සමාජයත් පසුගිය මාස කිහිපයක කාලය ඇතුළත මගේ ජීවිතයෙන් ඈත්ව ගිහින්. අද මට මා වෙනුවෙන් හිමිවිය යුතු පිළිගැනීම වගේම ජීවත් වෙන්නට සුදුසු සමාජ වටපිටාවකුත් හිමිව තිබෙනවා. සමාජ මාධ්‍ය වගේම ලිංගික අනන්‍යතාවය ගැටලුවක් වුණු පුද්ගලයන් වෙනුවෙන් වෙන්වූ අන්තර්ජාල ෆෝරම උදව් කරගෙන මගේ සැබෑ අනන්‍යතාවය මතින් තවත් ස්ථර ගොඩනගා ගන්නත් ඒ හරහා මගේ අනන්‍යතාවයට සැබෑ චරිතයක තිබිය යුතු ගැඹුර අත්පත් කර දෙන්නත් මට හැකියාව ලැබුණා. එයම එතෙක් මට තිබුණු එකිනෙකට වෙනස් ජීවිත කතා සහ ආදර කතා සියල්ල එකට ගොනු කර එක් කතාවක් බවට පත් කරගන්නට මාර්ගයක් බවට පත්වුණා.

පොදු සමාජයෙන් වෙනස් චරිතයක් විදියට මට හිමිවන විශේෂ තත්ත්වයන් ගැන වගේම ඒ පොදු සමාජයෙන් මට එරෙහිව එල්ලවන පීඩාවන් ගැනත් නිසි පරිදි තේරුම් බේරුම් කරගත් පුද්ගලයෙක් විදියට අද මම මාවම දකිනවා. පොදු සමාජය ගැනත් මා ගැනත් මට අනන්‍ය මති මතාන්තර ලෝකයට කියා පාන්න සුදුසු මාධ්‍යයක් අද මා හමුවේ තිබෙනවා. මේ සියල්ලම නිසා මගේ ගැන ලෝකයට කියන්නට අවශ්‍ය ශක්තිය වගේම හැකියාවත් අද මා සතුයි. මා ගැහැනියක් නෙවෙයි, මා පිරිමියෙකුත් නෙවෙයි. නමුත් මම ගැහැනියක හෝ පිරිමියෙකු නොවන මනුෂ්‍යයෙක්.

 

මේ ඔබ කියෙව්වේ නාදිකා නඞ්ජාගේ සම්පූර්ණ ජීවිත කතාවෙන් ඉතාම කුඩා ස්වල්පයක්. පොදු සමාජයේ පොදු ලේබලයන්ට අනුව ‘වෙනස්’ චරිතයක් වන නාදිකා වැනි අයෙකු සම්බන්ධයෙන් අපි කියවන්නේ අල්ප වශයෙන්, ඒ කියවන ප්‍රමාණයෙනුත් තවත් ඉතාම කුඩා ප්‍රමාණයක් හැරෙන්න අපි ඔවුන් ගැනවත් ඔවුන්ගේ ප්‍රශ්න ගැන හෝ අයිතිවාසිකම් ගැනවත් තේරුම් ගන්නෙත් නැහැ. ඒ නිසා වෙනස් ලිංගික අනන්‍යතාවයක් සහිත ප්‍රජාවන්ගේ අයිතිවාසිකම් සහ ඔවුන්ගේ අවශ්‍යතාවයන් පිළිබඳව නාදිකා නඞ්ජාගේ කතාව ඇසුරින් හෝ යම් අවබෝධයක් පාඨක ඔබ වෙත ලබාදීමයි ‘සමබිම’ අපේ බලාපොරොත්තුව වුණේ. කලාප 05 ක් පුරාවට සමබිම විසින් ඔබ වෙත ගෙන ආ නාදිකා නඞ්ජාගේ කතාව මෙතැනින් අවසන් වෙනවා.

පරිවර්තනය කළේ – ප්‍රගීත් ලියනාරච්චි

Recent Posts

Tags: ,

Leave a Comment