යුද්ධයේ අන්තිම දවස්වල ඇත්තටම සිදුවුණේ මොකක්ද?

Dec 28th, 2012 | By | Category: ප්‍රතිසන්ධානය

එක්සත් රටක් වෙනුවෙන් සටන් කරන උතුරේ හමුදාව සහ බෙදී වෙන්වීම වෙනුවෙන් සටන් කරන දකුණේ හමුදාව අතර සිව් අවුරුද්දක් තිස්සේ පැවතුණු යුද්ධය අවසාන අදියරට ළඟා වී ඇත.

දකුණේ හමුදා නායකයා යුද ශිල්පයෙහි කෙළ පැමිණියෙකි. යුද්ධය මෙතරම් කලක් අල්ලා ගෙන සිටියේද ඔහුගේ උපායශීලී යුද නායකත්වය නිසාය. නමුත් උතුරේ හමුදාවේ මිනිස් බලය සහ යුද ශක්තිය අවසානයේ ජයගත්තේය.

ඇමරිකානු සිවිල් යුද්ධය යනුවෙන් හඳුනා ගන්නා සිව් අවුරුදු කටුක යුද්ධයේ අවසානය 1865 අප්‍රේල් මාසය අවසාන වනවිට ළඟා විය. උතුරේ හමුදාවන්ගේ නායක ජෙනරාල් යුලිසිස් එස්. ග්‍රාන්ට් විසින් ජෙනරාල් රොබට් ඊ. ලීගේ දකුණේ හමුදාව වර්ජිනියාහි රිච්මන්ඩ් සහ පීටර්ස්බර්ග් නගරවලින් පළවා හැරියහ. ජෙනරාල් ලී වර්ජිනියා ප්‍රාන්තය හරහා බටහිර දෙසට පසු බැස්සේය. ඔහුගේ විඩාපත් සහ සාගින්නෙන් පෙළුණු හමුදාව දකුණු දිගට පසු බැස කරොලයිනාවට යාමට තැත් කළ ද ග්‍රාන්ට්ගේ හමුදා විසින් එම මාර්ගය අවහිර කරන ලදී.

අප්‍රේල් 8 වන සෙනසුරාදා වන විට තවදුරටත් පළා යාම නොකළ හැක්කක් බව ලීගේ හමුදාවට පසක් විය. පසුවදා හිමිදිරි පාන්දර තමා වට කොට සිටින ග්‍රාන්ට්ගේ උතුරු හමුදාවේ ඉදිරි ආරක්ෂක වළල්ල බිඳ දමා ඉදිරියට යාමට ලී උත්සාහ කළද එයද අසාර්ථක විය.

යටත්වීම හැර වෙනත් කිසිදු විකල්පයක් ඉතිරිව නැති බව පැහැදිලිය.

යටත්වීම පිළිබඳ කොන්දේසි තීරණය කරගැනීමට අවශ්‍ය බැවින් ඒ පිළිබඳව සාකච්ඡා කිරීමට තමා හමුවන ලෙස ඉල්ලා උතුරේ යුනියන් හමුදාවේ නායක ජෙනරාල් ග්‍රාන්ට් වෙත සංදේශයක් යැවීමට දකුණේ කොන්ෆෙඩරසි හමුදාවේ නායක ජෙනරාල් ලී කටයුතු කළේය.

පැය කිහිපයකට පසුව ජෙනරාල් ග්‍රාන්ට් ඇපොමැටොක්ස් හන්දියට පැමිණියේය. එහි එක්තරා නිවසක ජෙනරාල් ලී තම ප්‍රතිවාදී සෙන්පතියා එනතුරු බලා සිටියේය. ග්‍රාන්ට් නිවසට ඇතුළු වන විට ලී හුනස්නෙන් නැගිට ඔහු පිළිගත්තේය.

සමස්ත යුනියන් හමුදාවල නායකයා වූ ජෙනරාල් ග්‍රාන්ට් ඇඳ සිටියේ ශ්‍රේෂ්ඨ හමුදා නායකයෙකුට සරිලන ලෙස නොව ඉතා සරල ඇඳුම් පැළඳුම්ය. තම හමුදාවේ පහළම ශ්‍රේණියේ හමුදා සෙබළා විසින් අඳින ඇඳුමින් ඔහුගේ නිල ඇඳුම වෙනස් වූයේ නැත. නමුත් ඔහුගේ උර පටියෙහි යූනියන් හමුදාවේ ඉහළම නායකයාට හිමි ස්වර්ණමය තාරකා තුනක් දිස් විය.

ජෙනරාල් ලී තමා සතු හොඳම ඇඳුම් ආයිත්තම්වලින් සැරසී සිටියේය. ඔහු සිය ඇලයෙහි ඇත් දතින් සහ රිදියෙන් කළ කඩුවක් පැළැඳ සිටියේය.
සතුරු ජෙනරාල්වරු දෙදෙන එකිනෙකාට සුබ පතා අතට අත දී ආචාර සමාචාර කළහ.

“ජෙනරාල් ලී, මම කලින් වතාවක ඔබව හමු වී තිබෙනවා. ඒ අප දෙදෙනාම මෙක්සිකෝවේ යුද සේවයේ යෙදෙන අතරතුරයි.” ජෙනරාල් ග්‍රාන්ට් කීවේය.

“මම දන්නවා මා ඒ කාලයේ ඔබව මුණ ගැසී ඇති බව. නමුත් මට ඔබගේ මුහුණුවර මතකයේ තිබුණෙ නැහැ.” ජෙනරාල් ලී පිළිතුරු දුන්නේය.

මිනිත්තු කිහිපයක් ජෙනරාල්වරු දෙදෙන ආගිය තොරතුරු සහ මෙක්සිකෝවේදී තමන් එකට යුද සේවයේ යෙදී සිටි ආකාරය පිළිබඳ කතා බහක යෙදුණහ.

“ජෙනරාල් ග්‍රාන්ට්, මම හිතන්නෙ ඔබ දන්නවා මා ඔබ හමු වීමට අවශ්‍ය යැයි කිව්වේ මගේ හමුදාව ඔබට යටත්වීම පිළිබඳව කොන්දේසි ගැන කතා කරන්නට බව.” අන්තිමේදී ජෙනරාල් ලී මාතෘකාවට පිවිසියේය.
“කොන්දේසි මම කලින් ලිපියක ඔබට දැන්වූ ඒවාම තමයි. යටත්වෙන හමුදා නිලධාරීන් සහ සෙබළුන් නැවත සන්නද්ධ නොවිය යුතුයි. ඔබ සතු සියලු ආයුධ සහ සැපයුම් අත්පත් කරගත් දේපළ බවට පත් වෙනවා.”
එම කොන්දේසි තමා අපේක්ෂා කළ ඒවා බවත්, තමා ඒවාට එකඟ වන බවත් ජෙනරාල් ලී ප්‍රකාශ කළේය. එම කොන්දේසිවලට තමාට අත්සන් කළ හැකි ආකාරයට එය ලේඛනගත කරන ලෙස ඔහු ඉල්ලා සිටියේය.
“බොහොම හොඳයි. මම දැන්ම ලියන්නම්” කී ජෙනරාල් ග්‍රාන්ට් යටත්වීමේ කොන්දේසි අඩංගු ලේඛනය පිළියෙල කළේය. ඔහු ලියා තිබුණේ එකම වාක්‍යයකි.

“කොන්ෆෙඩරල් හමුදාව සතු ආයුධ, කාලතුවක්කු සහ පොදු දේපළ යූනියන් හමුදාව වෙත භාර දිය යුතුය.” ලිවීම නැවැත්වූ ජෙනරාල් ග්‍රාන්ට් තම සතුරු සෙන්පති මහලු ජෙනරාල් ලී පැළැඳ සිටි කඩුව දෙස බැලීය. ඔහුගේ කඩුව ඔහුට අහිමි කිරීමෙන් ජෙනරාල්වරයාගේ ආත්ම අභිමානයට හානි කිරීම නුසුදුසු බව ඔහු තීරණය කළේය. එබැවින් ඔහු ලේඛනයට මෙසේද එකතු කළේය.

“නිලධාරීන්ගේ පෞද්ගලික අවි හෝ ඔවුන්ගේ අශ්වයන් හෝ ඔවුන් සතු පෞද්ගලික දේපළ මෙයට ඇතුළත් නොවේ. සෑම නිලධාරියෙකුටම සහ සෙබළෙකුටම තම නිවස බලා යාමට අවකාශය සැලසිය යුතුය. ඔහු මෙම ගිවිසුමට ගරු කරමින් ඒ අනුව කටයුතු කරනතාක් දුරට සහ තමා වෙසෙන ප්‍රදේශයේ නීතිය අනුව කටයුතු කරන්නේ නම් ඇමරිකා එක්සත් ජනපදයේ පාලනාධිකාරිය වෙතින් ඔහුට කිසිදු බාධාවක් හෝ හිරිහැරයක් ඇති නොවනු ඇත.”

ජෙනරාල් ග්‍රාන්ට් තම ලියවිල්ල ජෙනරාල් ලීට භාර දුන්නේය. ලී එය සෙමින් කියවා බැලුවේය. කියවා අවසන් වූ පසු ජෙනරාල් ග්‍රාන්ට් ලීගෙන් විමසුවේ ගිවිසුමේ කොන්දේසි සම්බන්ධයෙන් කිසියම් වෙනසක් කිරීමට අවශ්‍ය ද කියාය.
මොහොතක් නිහඬව සිටි ජෙනරාල් ලී ඉන්පසු මෙසේ කීවේය.

“එක ප්‍රශ්නයක් තියෙනවා. අපේ හමුදාවේ කාලතුවක්කු භටයින් ළඟ සිටින අශ්වයන් ඔවුන් ගෙවල්වලින් ගෙනාපු එවුනුයි. ඔවුන්ට තමන්ගේ අශ්වයන් ආපසු අරගෙන යන්න ඉඩ දෙන්න පුළුවන්ද?”
“මේ ගිවිසුමේ කොන්දේසි අනුව ඒකට ඉඩක් නැහැ. තමන්ගේ පෞද්ගලික දේපළ අරගෙන යන්න පුළුවන් වෙන්නේ නිලධාරීන්ට පමණයි.” ජෙනරාල් ග්‍රාන්ට් කීවේය.

“ඔබ නිවැරදියි. කොන්දේසි අනුව එයට ඉඩක් නැති බව මට පැහැදිලියි.” ලී කීවේය.

මේ මොහොත වෙන තෙක්ම ජෙනරාල් ලීගේ මුහුණේ කිසිදු හැඟීමක් පළ නොවීය. නමුත් මොහොතකට ඔහුගේ ආත්ම ශක්තිය බිඳ වැටිණි. මෙම අවසාන ඉල්ලීම ලීට කෙතරම් වැදගත්දැයි ග්‍රාන්ට්ට පැහැදිලි විය.

“හොඳයි” ග්‍රාන්ට් කීවේය. “මම දැන සිටියේ නැහැ සාමාන්‍ය සෙබළුන් ළඟ සිටි අශ්වයන් ඔවුන්ට අයිති බව. නමුත් මම හිතනවා මෙය අවසාන සංග්‍රාමය බව. එසේ වේවා යැයි මම අවංකවම ප්‍රාර්ථනා කරනවා. මම හිතනවා මේ යටත්වීම ආදර්ශයට ගෙන ඉතිරි වී ඉන්න අනිත් අයත් යටත් වෙයි කියා. ඔබගේ සෙබළුන්ගෙන් විශාල පිරිසක් සුළු පරිමාණ ගොවියන් නිසා මීළඟ සීත සමයට අවශ්‍ය ආහාර වගා කරන්නට ඔවුන්ට අශ්වයන් අවශ්‍ය බව මට තේරෙනවා. මෙහි ලියන ලද කොන්දේසි මම වෙනස් නොකරමි. කෙසේ වුවත් තමන්ගේ කුඩා ගොවිපොළවල් වගා කරගැනීම සඳහා තමාට අයත් අශ්වයින් හෝ කොටළුවන් ආපසු රැගෙන යන්නට ඕනෑම සෙබළෙකුට අවසර දෙන ලෙස මා මගේ නිලධාරීන්ට නියෝග කරන්නම්.” ජෙනරාල් ග්‍රාන්ට් පැවසුවේය.

මෙයින් ජෙනරාල් ලී සතුටට පත් විය. “මේ තීරණ නිසා මගේ කොල්ලො ගොඩක් සතුටු වෙයි. මේක අපේ මිනිස්සුන්ට කරපු ලොකුම උදව්වක්.” ඔහු ජෙනරාල් ග්‍රාන්ට්ට කීවේය.

මිනිත්තු කිහිපයකට පසුව ලී ග්‍රාන්ට් දෙසට හැරී මෙසේ කීවේය. “යුනියන් හමුදාවේ සෙබළුන් දහසක් පමණ යුද සිරකරුවන් හැටියට මගේ අත්අඩංගුවේ ඉන්නවා. පසුගිය දවස්වල ඔවුන්ට ආහාර වශයෙන් දීමට කිසිම දෙයක් තිබුණේ නැහැ. ඒ නිසා මට සිද්ධ වුණා ඔවුන්ට බඩ ඉරිඟු දෙන්න. මගේ සෙබළුන් සම්පූර්ණයෙන්ම බඩගින්නේ.”

තම සැපයුම් භාර හමුදා නිලධාරියා ඇමතූ ජෙනරාල් ග්‍රාන්ට් 25,000 ක් වූ කොන්ෆෙඩරේට් හමුදාවේ සෙබළුන්ට ආහාර තොග යවන ලෙස නියෝග කළේය.

අවසානයේදී යටත්වීමේ ගිවිසුම පිටපත් කොට අවසන් විය. යූනියන් හමුදාව වෙනුවෙන් ජෙනරාල් ග්‍රාන්ට් ද කොන්ෆෙඩරසි හමුදාව වෙනුවෙන් ජෙනරාල් ලී ද එයට අත්සන් තැබූහ. අනතුරුව ලී ග්‍රාන්ට්ට අතට අත දී නිවසින් පිටව ගියේය.
තම අසු පිට නැගුණු ලී සෙමෙන් සෙමෙන් තම හමුදාව වෙත ගමන් කළේය. ඔහු දකුණේ හමුදාවේ ඉදිරි ආරක්ෂක වළල්ල අසලට එත්ම ඔහුගේ සෙබළු ජයඝෝෂා කරන්නට විය. නමුත් තම සෙන්පතියාගේ මුහුණෙහි සටහන්ව තිබුණු වේදනාව දුටු විට ජය ඝෝෂාව නිහඬ විය. ජෙනරාල් ලීගේ දෙනෙත් කඳුළින් පිරුණේය. ඔහුට කතා කර ගත නොහැකි විය. සෙබළු තම හිස් වැසුම් ගලවා නිහඬව තම සෙන්පතියා තමා පසු කොට යන හැටි බලා සිටියහ. බොහෝ දෙනෙකු හඬා වැළපුණහ.

තවත් සෙබළුන් රැසක් ඔහු එනතුරු මූලස්ථානයේ රැඳී සිටියහ. ජෙනරාල්වරයා ස්පර්ශ කිරීමට, ඔහුට අතට අත දීමට ඔවුහු පොර කෑහ.

ජෙනරාල් ලී කතාව පටන් ගත්තේය. “කොල්ලනේ, නුඹලා වෙනුවෙන් කරන්නට පුළුවන් උපරිමය මම කළා. දැන් නුඹලා තම තමන්ගේ ගෙවල්වලට පලයල්ලා. හොඳ සෙබළුන් ලෙස නුඹලා කටයුතු කළ ආකාරයටම යහපත් පුරවැසියන් වශයෙන් කටයුතු කිරීමට නුඹලාට හැකි වුණොත් නුඹලාට වරදින්නේ නැහැ. මම නිරතුරුවම නුඹලා ගැන ආඩම්බර වන්නෙමි. අපි සමු ගනිමු. නුඹලා සියලු දෙනාටම දෙවියන්ගේ පිහිටයි!”

යුද පෙරමුණේ අනෙක් පැත්තෙහි උතුරු යූනියන් හමුදාවේ සෙබළු තම විජයග්‍රහණය සමරන්නට පටන් ගත්හ. බෙදුම්වාදී කොන්ෆෙඩරසි හමුදාව අන්තිමේදී පරාජය භාර ගෙන ඇත. රට එක්සත් වී ඇත. ජෙනරාල් ලීගේ හමුදාව පරදවා ලැබූ ජයග්‍රහණය වෙනුවෙන් උත්තමාචාර පුදනු වස් කාලතුවක්කු බලකාය ආචාර වෙඩිමුර දැල්වීය.

කාලතුවක්කු හඬ ජයග්‍රාහී සෙන්පති ජෙනරාල් ග්‍රාන්ට්ට ඇසිණි. වහාම එම ආචාර වෙඩිමුර නවත්වන ලෙස ඔහු නියෝග කළේය. “ඇමරිකා එක්සත් ජනපදයට විරුද්ධව කැරලි ගැසූ කැරලිකරුවන් දැන් නැවතත් අපේ සහෝදර රටවැසියන් බවට පත් වුණා.” ග්‍රාන්ට් කීවේය. “අපගේ ප්‍රීතිය ප්‍රදර්ශනය කළ හැකි හොඳම විදිය නම් ඔවුන්ගේ පරාජය සැමරීම ප්‍රතික්ෂේප කිරීමයි.”

ජෙනරාල් ග්‍රාන්ට් ඇපොමැටොක්ස් හන්දියෙන් පිටත්ව කිලෝමීටර කිහිපයක් ඈතින් තිබුණු තම මූලස්ථානය වෙත යාමට සැරසිණි. හදිසියේම ඔහුට යමක් සිහි විය. හේ තම අශ්වයා නැවැත්වීය. ජෙනරාල් ලී යටත්වුණු බව ජනාධිපතිවරයාට හෝ ආරක්ෂක ලේකම්වරයාට දැනුම් දීමට ඔහුට අමතක වී තිබිණි. ඔහු පාර අයිනේ හිඳ ගෙනම ආරක්ෂක ලේකම් ස්ටැන්ටන්ට යැවීමට ටෙලිග්‍රූමයක් ලිවීය.

බෙදුම්වාදී කොන්ෆෙඩරසි හමුදාව යටත් වීමේ ප්‍රවෘත්තිය වොෂින්ටන් නුවරට ළඟා වූයේ ඉරිදා සවස් වරුවේය. නගරයේ පුරවැසියන්ගෙන් බොහෝ දෙනෙක් එය දැන ගත්තේ සඳුදා පාන්දරය. ඉන් අනතුරුව නගරය පුරා කාලතුවක්කු හඬ නද දෙන්නට පටන් ගත්තේය. ජනතාව ධවල මන්දිරය වෙත දිව ගියේ යුද ජයග්‍රහණය වෙනුවෙන් ජනාධිපති ඒබ්‍රහම් ලින්කන්ට සුබ පැතීමටය. ජයග්‍රහණය ප්‍රකාශ කරමින් කතාවක් පවත්වන්නැයි ජනතාව ජනාධිපතිවරයාගෙන් ඉල්ලා සිටියහ.

තමන්ගේ ජයග්‍රහණය සැමරීමට හෝ කොන්ෆෙඩරසි හමුදාවේ පරාජය සැමරීමට හෝ ජනතාව ඇමතීමට හෝ තමාට හදිසියක් නොමැති බව සිය ජනතාවට කියා සිටි ජනාධිපති ලින්කන් නිල වශයෙන් ජයග්‍රහණය ප්‍රකාශ කිරීම සඳහා පසුවදා රාත්‍රිය තෙක් ඉවසන්නැයි ජනතාවට කීවේය∎

සුදර්ශන ගුණවර්ධන

Recent Posts

Tags: , , , ,

Leave a Comment